Greiðsluþátttaka Sjúkratrygginga Íslands
Sjúkratryggingar Íslands (SÍ) veita styrki vegna kaupa á heyrnartækjum. Styrkur er veittur á fjögurra ára fresti. Skilyrði fyrir greiðsluþátttöku eru eftirfarandi: Umsækjandi er 18 ára eða eldri, sjúkratryggður á Íslandi og tónmeðalgildi á betra eyranu er ≥30 dB til <70 dB.
Fjárhæð styrks er 60.000 kr. fyrir eitt tæki og 120.000 kr. fyrir tæki í bæði eyru. Við sjáum um að sækja um niðurgreiðslu eigir þú rétt á henni skv. reglugerð um styrki vegna kaupa á heyrnartækjum.
Styrkir frá stéttarfélögum og uppbót á lífeyri
Fjölmörg stéttarfélög veita styrk vegna kaupa á heyrnartækjum. Við ráðleggjum þér að hafa samband við stéttarfélagið þitt til að kanna hvort þú eigir rétt á styrk vegna heyrnartækjakaupa.
Uppbót á lífeyri frá Tryggingastofnun, er mánaðarleg upphæð sem bætist við örorku- og ellilífeyrisgreiðslur eða sjúkra- og endurhæfingagreiðslur ef réttur er til staðar. Uppbót er meðal annars ætlað að mæta kostnaði vegna kaupa á heyrnartækjum. Umsækjandi þarf að uppfylla skilyrði um hámarkstekjur til að eiga rétt á uppbót á lífeyri.
